1 Samuel 19
1 掃羅對佢个孻仔約拿單㧯所有个官員講，愛設法除掉大衛；總係約拿單當惜大衛，
2 就去㧯佢講：「吾爸想愛㓾你。天光日打早，你愛囥在祕密个所在，留在該位。
3 𠊎會到你囥个田肚，企在吾爸身邊㧯佢談論你个事。𠊎發現麼介情況，一定會㧯你講。」
4 約拿單在厥爸掃羅面前稱讚大衛，又講：「請王毋好傷害王个僕人大衛。佢從來毋識做對毋起你个事；反轉佢所做个全部對你大有好處。
5 佢冒生命个危險去㓾該非利士人歌利亞；上主使全以色列大大打贏。該時你看到，就當歡喜，這下做麼介愛傷害一個無辜个人，無緣無故去㓾大衛呢？」
6 掃羅聽約拿單个話，就指上主个名發誓毋㓾大衛。
7 約拿單喊大衛來，將這一切个話全部㧯佢講，然後帶佢去見掃羅。所以大衛像以前恁樣服事王。
8 以色列人㧯非利士人又再發生戰爭。大衛攻擊非利士人，大大打贏佢等，佢等就全部逃走。
9 有一日，對上主該位來个邪靈又作躁掃羅。掃羅手項拿等槍，坐在屋肚；大衛也在該位彈琴。
10 掃羅想愛用佢个槍將大衛刺在壁頂，總係大衛閃開，槍刺在壁頂。大衛就逃走，離開該位。
11 該暗晡，掃羅派人去監視大衛个屋下，愛在第二朝晨㓾佢。大衛个𡜵娘米甲警告大衛講：「你今暗晡若毋走，天光日你一定會死。」
12 所以米甲對窗門將大衛縋下去，俾佢逃走。
13 米甲將一尊屋下个神像放在眠床頂，用一隻山羊毛枕頭俾神像墊頭那，用被蓋等。
14 掃羅个人來捉大衛个時，米甲㧯佢等講大衛發病仔。
15 總係掃羅愛佢等再去看大衛。掃羅又吩咐：「將佢連人帶眠床共下扛轉來，𠊎愛㓾佢。」
16 佢等入到屋肚，發現睡在眠床頂个係一尊屋下个神像，頭那墊等一隻山羊毛个枕頭。
17 掃羅問米甲：「你樣般恁樣騙𠊎，放𠊎个敵人逃走？」米甲應講：「佢講𠊎毋放佢走，佢就愛㓾𠊎。」
18 大衛逃到拉瑪去見撒母耳，將掃羅對佢做个事全部㧯撒母耳講。然後，佢㧯撒母耳共下到拿約去，住在該位。
19 有人㧯掃羅講，大衛在拉瑪个拿約，
20 掃羅就派人去捉大衛。佢等看到一群先知受感入神忘形講話，撒母耳企在佢等當中帶頭。上帝个靈也臨到掃羅派去个人，佢等就受感入神忘形講話。
21 掃羅聽到這個消息，就派過較多人去；這兜人也㧯先前去个人共樣受感入神忘形講話。掃羅第三擺派人去，共樣个事又發生。
22 最尾掃羅親身到拉瑪去。當佢來到西沽該口大井堘个時，佢打探撒母耳㧯大衛在麼介所在。有人㧯佢講，佢等在拉瑪个拿約。
23 掃羅愛去該位个時，上帝个靈也臨到佢，佢就受感入神忘形緊行緊講話，直到拿約。
24 佢在撒母耳面前脫掉自家个衫褲，受感入神忘形講話，一日一夜無著衫褲橫等。所以有一句俗語講：「掃羅敢也成做先知嗎？」